Jos 1 | NdeIBE | STEP | Ngemva kokufa kukaMosi inceku kaJehova, uJehova wathi kuJoshuwa indodana kaNuni, umsekeli kaMosi:

Joshua 1

UJehova ulaya uJoshuwa

1 Ngemva kokufa kukaMosi inceku kaJehova, uJehova wathi kuJoshuwa indodana kaNuni, umsekeli kaMosi: 2 “UMosi inceku yami usefile. Ngakho-ke wena labantu bonke laba lungiselani ukuchapha umfula uJodani liye elizweni esengizalinika bona abako-Israyeli. 3 Ngizalinika zonke izindawo lapho elizanyathela ngezinyawo zenu njengokuthembisa engakwenza kuMosi.

4 Ilizwe lenu lizasukela enkangala yeLebhanoni, lasemfuleni omkhulu uYufrathe – ilizwe lonke lamaHithi – lize liyekhawula olwandle olukhulu entshonalanga. 5 Kakulamuntu ozakwanelisa ukumelana lani zonke izinsuku zokuphila kwenu. Njengoba ngangiloMosi ngizakuba lawe; kangisoze ngikutshiye, kangisoze ngikudele.

6 “Qina ube lesibindi, ngenxa yokuthi uzakhokhela abantu laba ukuze bayethatha ilifa eliyilizwe engafunga kubokhokho babo ukuthi ngizabanika lona. 7 Qina ube lesibindi. Nanzelela ukuthi ulandela yonke imithetho inceku yami uMosi akupha yona: ungaze waphambuka kuyo uye kwesokunene kumbe esokhohlo ukuze uphumelele kuzo zonke izindawo ozakuya kuzo.

8 Incwadi yomthetho le kayingasuki emlonyeni wakho: cabanga ngayo emini lebusuku, ukuze unanzelele ukuthi wenza konke okulotshwe kuyo. Ngakho uzaphumelela. 9 Angikulayanga na? Qina ube lesibindi ungethuki njalo ungalahli ithemba, ngoba uJehova uNkulunkulu wakho uzakuba lawe loba kungaphi lapho oya khona”

10 Ngakho-ke uJoshuwa walaya iziphathamandla zabantu wathi: 11 “Dabulani phakathi kwezihonqo litshele abantu ukuthi, “Hlalani lilungisile imiphako yenu. Ezinsukwini ezintathu kusukela lamhla lizachapha uJodani lapha ukuze lingene liyethatha ilizwe uJehova uNkulunkulu wenu alinika lona ukuba libe ngelenu!”

12 UJoshuwa wathi kwabakoRubheni, labakoGadi lengxenye yesizwana sika Manase,

13 “Khumbulani umlayo uMosi inceku kaJehova alinika wona owokuthi: ‘UJehova uNkulunkulu wenu uyaliphumuza njalo ulinika ilizwe leli.’

14 Amakhosikazi enu, abantwabenu lezifuyo zenu zingahlala elizweni elalinikwa nguMosi empumalanga yeJodani, kodwa ibutho lenu lonke, lihlome liphelele, kumele lichaphe ngaphambi kwabafowenu. Kuzamele lincedise abafowenu 15 uJehova aze abaphumuze, njengalokho alenzele khona lina, labo baze bathathe ilizwe leli uJehova uNkulunkulu wenu abanika lona. Ngemva kwalokho selingabuyela liyehlala elizweni lenu, uMosi inceku kaJehova alinika lona ngempumalanga yeJodani.

16 Baphendula uJoshuwa bathi, “Konke osilaya khona sizakwenza, lalapho osithuma khona sizahamba. 17 Njengalokhu salalela uMosi ngokupheleleyo lawe sizakulalela. Sifisa ukuthi uJehova uNkulunkulu wakho abe lawe njengoba wayeloMosi. 18 Yiloba ngubani ohlamukela ilizwi lakho njalo engalaleli lokho okutshoyo, lalokho oyabe ukulaya, kumele abulawe. Kumele uqine ube lesibindi!”